اليوم هو ثانى محاضرة من محاضرات كورس السوفت وير المبسط للسامسونج جلاكسى
المحاضره بعنوان مقدمه هامه عن السوفت وير والبرامج اللازمه للعمل
اولا ايه هو السوفت وير؟
السوفت وير هو الجزء الغير ملموس فى اى جهاز الكترونى والذى لا يمكن التوصل اليه الا عن طريق الكمبيوتر واجهزة البرمجه
طيب هتقولى برده انا مش فاهم ..هقولك ان اى جهاز الكترونى بيتكون من جزء ملموس وجزء غير ملموس
الجزء الملموس ده الهارد وير او المكونات الصلبه
والجزء الغير ملموس هو السوفت وير او البرنامج
هتقولى معنى كده ان السوفت وير ده هو البرنامج المشغل للموبايل ..هقولك بالظبط كده ولأى جهاز الكترونى
وبمعنى اخر ان السوفت وير زى الويندوز للكمبيوتر
والهاردوير زى ال CPU او الكيسه للكمبيوتر تمام لحد كدة..
طيب تعالوا نعرف مع بعض ازاى بنوصل الموبايل عشان نعملة سوفت وير
طيب الموبايل عشان يتوصل على الكمبيوتر ويتعملة سوفت وير لازم يكون فى وسيط
يعنى ايه وسيط؟؟ هقولك اجهزة البرمجه
اللى احنا بنسميها بوكسات البرمجه
هتقولى انا معنديش بوكسات هقولك خليك للأخر وانا هعرفك ازاى ممكن تستغنى عنها جزئيا
طيب اية هى البوكسات دى ؟؟
دى اجهزة بتكون زى وسيط بين الموبايل والكمبيوتر بتدى اوامر للكمبيوتر عشان يعرف يكتبها للموبايل
ومن باب المعرفه اشهر بوكسات السامسونج بوكسس اسمة Z3X ودى صورته
طيب يعنى كده خلاص كمبيوتر وبوكس وخلاص؟؟
لاء لازم التعاريف او الدرايفرات اللى بتخلى الكمبيوتر يقرا الموبايل ويعرف يتعامل معاه
والتعاريف بتاعت اجهزة السامسونج جميعها بتسطب البرنامجين
من شركة سامسونج بتتعرف وبتبقى الدنيا تمام
طيب ياعم خلاص كدة؟؟
لاء طبعا انت مستعجل على اية لازم يكون معاك كابل usb اللى هتوصل بية الموبايل على الكمبيوتر
خلاص كدة ولا لسة حاجه تانى ياعم؟؟
هقولك كده مش فاضل غير انك تحمل الروم المناسب للموبايل
ايه الروم ده ياعم؟؟
الروم ده هو ملف السوفت وير
طيب كده من باب المراجعه احنا محتاجين اية عشان نعرف ننزل سوفت وير للموبايل؟؟
كمبيوتر
بوكس
كابل usb
درايفرات
الروم المناسب للموبايل
طيب احنا كده خلاص جاهزين نعمل السوفت وير
كده مش فاضل غير انك تعرف ازاى هتسغنى عن البوكس
ويعنى ايه هستغنى عنه جزئيا؟؟
هتحمل البرنامج ده برنامج صغير ومجانى هيخليك تستغنى عن البوكس وتعمل سوفت وير لأى موبايل سامسونج جلاكسى
دول نسختين مختلفتين حمل اى واحد
يعنى ايه بقى هستغنى عن البوكس جزئيا؟؟
البوكس ده حاجه اساسية لأى فنى سوفت وير لانة هو الوحيد القادر على تصليح السيريال نمبر وتصليح الشبكة وعمل انلوك وحاجات كتير
يعنى باختصار البرنامج هيخليك تعمل سوفت وير فقط لاغير
طيب احنا كده خلاص مطلوب منك تفهم المحاضرة دى كويس جدا عشان دى اللى مبنى عليها الجزء اللى جاى وهو تسطيب السوفت وبر
غدا نلتقى ان شاء الله..
ليست هناك تعليقات:
إرسال تعليق